مسلسل سنوات الضياع (الأصلي)

السلام عليكم ورحمة الله وبركاته ,,,
شباب وبنات اكيد كل واحد فيكم شاف مسلسل سنوات الضياع (التركي)
بس ما اظن ان فيه احد قرا قصة مسلسل سنوات الضياع الأصليه,,,
راح يكون مسلسل سنوات الضياع بدون أي مقدمات وبالغه العامية علشان مايتملل ويطفش القارئ .....
بداية المسلسل كانت حوالي قبل 9سنوات وكانت مع اخوي ((ع)) المدعو (حسين) وبصراحه هو مو اخوي بس كما قالت العرب قديما (رب أخا لك لم تلده أمك) وأنا سميته حسين نسبتا إلى المسلسل الكويتي المفضل عندي (درب الزلق) وطبعا مايحتاج أقول لكم وش كان هو يسمين .....!!!
نرجع فيكم لبداية الموضوع سنة 2000م كنت أنا واخوي حسين نسمع من ربعنا واللي كنا نعتبرهم ناصحين وفاهمين عن بلد إذا جلسنا معهم قعد كل واحد فيهم يتكلم عن هالبلد كأنك تسمع قصه من الخيال وتقول بينك وبين نفسك وين أنا عن هالبد (آه آه آه ... الخ) وحسافة عمري اللي ضاع وأنا مارحت لحد الحين وطبعا اللي كنا نقعد معهم ونسولف مو واحد ولا اثنين ولا ثلاثة بكل صراحه مافيه أصلا احد من اللي كنا نقعد معهم ونجيب لهم طاري هالديره إلا ياتشوفه يتنهد قبل مايتكلم عنها ولا يون إلا والله وناااااااات .
شكلكم تحمستوا تبون تعرفون وش هالديره أنا متأكد إن 80% من اللي قراء المقدمة عرفوا وش هالديره ....
(المغرب) اللي ماهنا احد ماتغنى فيها ...
جنه جنه ,,,,,,
شويخ من ارض مكناس ,,,,,,,
هاذا اللي يحضرني الحين وفيه غيرها وغيرها ..... آآآآآآه الله يسامحكم خليتوني اطلع من الموضوع وأنسى السالفه ...
طبعا أحب أذكركم إن الناس اللي كانوا يتكلمون عن هالديره ما يعرفون بعضهم ولا واحد فيهم يعرف الثاني وطبعا كانوا عن طريقي ولا عن طريق اخوي حسين وزي ماقلت لكم قبل إن الواحد فيهم إذا جاء يتكلم عن المغرب ماودك إلا تشوف شكله إذا جاء طاريها بالمجلس وهو يتكلم وقبل مايتكلم وإذا خلص راح اشرح لكم ربع ربع ماتتصورون ....
*عند طاريها قبل مايتكلم يايتنهد يايذكر لك اسم ديره ((أغادير ,مراكش, .... يااسم بنت .... غزلان .....))
*وإذا بدا بالكلام كأنك قاعد قدام شاعر إذا لكم بالشعر ولا كأنك تسمع لعملاق من عمالقة الفن إذا لكم بالطرب المراد انك تلتزم الصمت وأنواع التفهيه .
*وإذا انتهى من الكلام خاطر تقول له أحسن الله عزاك وعظم الله أجرك من كثر ماهو ضايق صدره على فرقا الديره .
وبصراحه ماابغى أخليكم تملون من كثر ماتقرون لاكن اسمحوا لي إنا كاتب لكم من الأول إن العنوان راح يكون (سنوات الضياع) يعني بطول عليكم بالكلام وبقول لكم وش كانوا يسولفون لنا عن هالديره والسوالف هاذي تراها على قولتهم نقطه من بحر .
إن كأنه متزوج تلقاه يلعن الساعه اللي تزوج فيها ويندب حظه المتعوس مع زوجته وطبعا تلقونه يحرصنا تقول شايب يوصي عياله قبل لايموت (( انتبهوا ,,, انتبهوا,,, لاتتزوجون))
ونسيت أقول لكم انه أنا واخوي حسين ماخلانا نأخر فكرة الزواج إلا كثرة السوالف عن هالديره قلنا مانبغا نتزوج وحنا مارحنا لها .
وان كأنه عزابي زينا تلقونه يسب ويلعن بالبنات الخليجيات ويركز على بنت بلادي (السعوديه)*
والسوالف اللي كنا نسمعها منهم وبلسان واحد إن البنت المغربيه آخر شي تفكر فيه هو الماده وان البنت المغربيه فيها حنان ودلع لدرجة تحس انك مسحور وبالواقع أنت مسحور بطيبتهم وحنانهم والبنت المغربيه تزعل وتعصب لو عطيتها فلوس بيدها والمغربيه فيها نظافه غير طبيعيه وماابغى أقول لكم وش كانوا يقولون لنا عن الأشياء الدقيقه (وصف الجسم) بالكامل والمغربيه,,,, والمغربيه,,,,, والمغربيه,,,,
لدرجة انك تقول وين أنا ضايع كل هاالسنين .
وبعد ماتنتهي القعده نتفرق وأنا واخوي حسين نقعد شوي مع بعض ونعلق على السوالف ونسب ونندب حضنا المنحوس اللي إلى الحين مارحنا للمغرب وتلقون كل واحد منا يسب ويلعن بصديقته وبالأصح بحبيبته ((اللي فيها ,,, واللي فيها,,,)) وبصراحه وبكل أمانه ولله الحمد اناواخوي حسين لاتتوقعون إن ماعندنا احد نعرفه الاوالله كل واحد منا عنده وحده تطيح الطير من السماء ((بنت بلادي ... بنت نجد...)) بس من كثر السوالف اللي سمعناها كل واحد منا زهد بحبيبته .
وإذا كنت قاعد أنا واخوي حسين عند التلفزيون وشفنا فديو كليب ولا دعايه فيها بنت حلوه حييييييل وملامحها عربيه على طول وش نقول عنها ,,,!!! (أكيد من المغرب ... سقاها السيل ) وتذكروا تكفون الكلمتين اللي قبل شوي (سقاها السيل)
وتمر الأيام والسنين وأنا واخوي حسين كل صيف نسافر لـ أوروبا وإذا رجعنا نقول لازم لازم السفره الجايه نروح للمغرب خلاص العمر راح وحنا ماسفرنا لها بلا أوروبا بلا خرابيط وأخيرا وبعد كل هالسنين قررت أنا واخوي حسين وكان القرار هاذا سنة 2008م وصرنا نجمع اكبر قدر ممكن من المعلومات عن هالبلد والظاهر لو فيه واحد منكم من سنة 2000م إلى سنة 2008م وهو يسمع عن هالديره مايحتاج انه يتعب وهو يجمع معلومات .
ويوم جاء موعد السفره كل واحد منا طبعا صرف أهله والناس اللي يعزون عليه وقال لهم بروح لأوروبا وبس واتفقنا اناواخوي حسين السفره راح تكون كالتالي :
(لبنان, بريطانيا,النمسا,سويسرا) وبصراحه السفره كانت : (لبنان, بريطانيا, المغرب) وأكثر الأيام كانت من نصيب (الحبيّبه ) بالتشديد والكسره يعني باللسان المغربي . وأسباب روحتنا للبنان علشان كان فيه واحد ثالث معنا ماعنده أجازه إلا عشرة أيام بس وبعدها بيرجع يداوم ولزم علينا نروح معه وبعدها بروح أنا واخوي حسين لبريطانيا علشان راح تكون وداعيه وبعدها المغررررب .
والحييييين نقول بسم الله وبدت الرحله ,,,
كان يوم الوصول لمطار بيروت ثاني أيام عيد الفطر وكان الجو رايق والعجّئه واصله حدها من العوائل الخليجيه وطلعنا على فندق الموفينبيك وحطينا أغراضنا وريحنا فذيك الغرفه وجلسه بالبلكونه اللي على البحر ترد الروح وبعدها يبدا البرنامج والظاهر مايحتاج أقول لكم كيف البرنامج بالنسبه لـ90% من العوائل الخليجيه :
1-تصحا من النوم.
2-غدا فوق بالجبل .
3-ستار بكس (الفردان) .
4-الفندق تغير ملابسك وتريح لك شوي .
5-السوليدير .
6-كل واحد يشوف شغله .
هذا بالنسبه لشباب والبنات نفس الشي بس زياده فيه روحه لصالونات بس ماادري متى . وطول ماكنا فبيروت أنا واخوي حسين كنا مهدين اللعب كله لعيون المغرب ومن سكنها وخوينا الثالث هو اللي منطفق ومندفع وشاد حليه وأنا واخوي حسين إذا شفنا غزال ماشيه,,, ورده جالسه,,, من بنت بلادي وطالعنا فيها قمنا وسبينا فيها ..
((وش عندها شايفه نفسها ))
((يامل الشين والله ))
((ماعليه وعدكم المغرب))
والسالفه ومافيها إن البنت ثقليه وراكده بس أنا واخوي حسين زي ماقلت لكم بخاطرنا ((جنه جنه)) وبصراحه وبكل أمانه ويشهد الله إننا كنا كلنا الثلاثه أشكالنا مو مقبوله إلا فوق فوق مقبوله لامن الجسم ولا من اللبس بالنسبه لناس اللي شفناهم وقابلناهم فبيروت ولندن ونسيت أقول لكم إن اخوي حسين وحنا فبيروت غير نغمة جواله وحطها أغنيه مغربيه كل هذا علشان يبغى يقهر البنات وأنا أنواع المشاكل مع اللبنانيين ((ياحرميه ,,,, يانصابين)) ومااكلها إلا خوينا الثالث كل ماجاء لواحد منا يبغاه يقوم معه يتمشى شوي أنواع الكرش وكان ضايق صدره يبي يروح معنا يكمل السفره بس دوامه .
وبعد ماعيدنا وجلسنا لنا عشر أيام فبيروت وأنا واخوي حسين جالسين فالبلكونه بآخر يوم سألني إذا تزوجت بعدين ولا وأنا عزوبي لي نيه ارجع لبيروت والظاهر أن جيتنا لبيروت هاذي كانت المره الخامسه بس هالمره النفس طايبه وكل شي شان بعيني ورديت عليه وقلت والله ماعاد اقبل عليها .... قال لي ولا يومين ولا ثلاثه ....!!!
قلت ولا نصف يوم ((حراميه ياشيخ )) .
وحنا رايحين للمطار بنطلع من بيروت لأبوضبي لأن رحلتنا كانت عن طريق طيران الاتحاد (امحق من طيران) لأننا دائما نطلع على (الخطوط الامارتيه) بس هالمره جتنا نصيحه من واحد ملحوس وقال جربوا الاتحاد والله لايعيدها من تجربه لو مايجيكم إلا البهذله اللي تبهذلها اخوي حسين عند مكاتبهم علشان يحسبون لنا الأميال والتقديم على العضويه حقتهم ....
ويله قربت الروحه للمغرب وبدا الحماس عندي أنا واخوي حسين وخوينا الثالث أنواع الطفش والحسد والتلعين لأننا بنروح للمغرب ولاراح يخاوينا وأنا والله ياناس ماكذبت عليكم أني طلبت منه إذا رجعنا من السفر وحس إن فينا شي ياخذنا لأخوه يقرا علينا لأن عنده أخوه مشاء الله عليه ملتزم ودين وهو الوحيد بالعائله ماادري وشلون طلع . وبعد ماودعنا خوينا فمطار ابوضبي بدينا أنا واخوي حسين نسوي اتصالاتنا بالربع الناصحين واللي يبون لنا الخير بالسعودية وأنا لي واحد من ربعي فالأمارات كلمته بعد علشان يشوفون أرقام فنادق وفلل وسواقين و(مرشدين سياحين) الاخيره خطو تحتها خطين .
وطلعنا من ابوضبي لمانشستر وبعدها على لندن ونفس الموال اللي كان فبيروت واشد إذا شفنا بنت بلادي (الله يقلعها على وشو شايفه نفسها.....) لاكن ماعليه الوعد المغرب .
وبعدها من بريطانيا لأبوضبي ومن ابوضبي لدار البيضاء (كازاااا) على قولة المطعسه ولكم تتخيلون الساعات اللي قعدناها بالطياره كله يهون لآجل المغرب .... سقاها السيل (لاتنسون الكلمتين) .
طلعنا من ابوضبي لدار البيضاء واللي كانوا معنا بالطياره كلهم شيبان وعجايز من المغرب وشكلهم توهم راجعين اخذين لهم عمره .... شوفوا الفرق بس ...
وبعد ماوصلنا على الفجر للمطار إلا السواق (محمد) ينتظرنا السواق هاذا عن طريق واحد من ربع اخوي حسين وحنا طالعين من مواقف المطار إلا ذاك اللي لابس بدله ويقولون له عندنا عسكري وبالمغرب (الدرك) وبالنسبه لي أنا واخوي حسين مانسميهم إلا (السلق) وقف السواق اللي معنا وتكلم عليه بالمغربي ورجع لنا السواق قال أبغى أعطيه بخشيش ليش؟ وعشان ايش؟ قال علشان يمشينا ولايأخرنا ....
آيه هاذي أولها طبعا عطاه بخشيش وهاذي أول مره نشوفها أنا واخوي حسين لأننا اللي نعرفه إن البخاشيش بس بصالة القدوم فبعض الدول اللي ماابغى اذكر اسمها وطبعا الديره هاذي اخذوا حقين المطار حقهم وزياده من البخاشيش بس سالفة حق المواقف جديده ....!!
طبعا أنا واخوي حسين قلنا (هاذا اولها ينعـ.....) .
لالالا يمكن حنا مضيعين وما فهمنا الديره لحد الحين ومانبي نحكم عليهم من أول يوم .
وبصراحه تذكرنا ربعنا الناصحين كانوا يقولون لنا إن (السلق) من يوم سحنة (ملامح) خليجي يدور عليه أي شي علشان ياخذ بخشيش .
طلعنا من المطار على وين ..... ؟
على مجمع فلل اسمه (النخيل) وهاذا في مراكش من وصفهم لنا للمجمع تتخيل كأنك رايح لشاليهات (الكريستال) إن كانك من المنطقه الغربيه وإلا شاليهات (الغروب) إن كانك من المنطقه الشرقيه ويووووووم وصلنا وش تشوفون ؟ سور فيه كم فليله وشجر ميت ..... وبعد مااخترنا الفله وحطينا اغراضنا وأخذنا من مكتبهم طباخه تطبخ لنا , (طبعا كل هاذا بتوصيات من الزملاء الناصحين ) .
وبعد مارتبنا أغراضنا وريحنا خلينا الشغاله (سعاد) تكتب لنا أغراض الطبخات المغربيه (طاجن ، حريره ، .....) وكتبت لنا أغراض حق أسبوع كامل وبعدها طلعنا مع السواق (محمد) نجيب الأغراض من مجمع عندهم اسمه (مرجان) هاذا زي (جيان) و(كارفور)و(السيفوي) عندنا ويوم وصلنا للمجمع إلا بقالات البحرين أطلق منه ... ((حتى القسم حق المشروبات الكحوليه كله مغشوش)) .
وطبعا كل هاذا وماقلنا شي أنا واخوي حسين نبغى نعطيهم فرصه ونشوف بعد وش فيها هاالديره والله ونطلع من البقاله قصدي المجمع وحنا ندف لنا عربيتين ورحنا للفله وخلينا الطباخه تطبخ لنا الغداء والسواق خليناه يروح يريح علشان أنا واخوي حسين نبي نريح بعد ويوم صحينا من النوم إلا نلقى (سعاد) طابخه لنا ذاك الطبخ اللي يفتح النفس وبعد ماتغدينا وصحصحنا دقينا على السواق (محمد) علشان نبي نطلع ونشوف مراكش وش فيها طلعنا ورحنا نتقهوا في مقهى والله أني نسيت وش اسمه بس اللي اذكره انه في أرقى منطقه عندهم هاذا على كلام السواق ....
وحنا بالمقهى أنا طلبت (موكا) كالعاده بس اخوي حسين ماشاءالله عليه متقمص الشخصيه صح لو تشوفونه كان تقولون هاذا مغربي مو خليجي طالب له ذاك الشاي المغربي ومافيه إلا قوة ديالي وديالي (حبيب قلبي والله) ...
وبعد ماخلصنا رجعنا للبيت وبدلنا اللبس على بالنا فالديار اللي تعودنا عليها من قبل , لازم تبدل ملابسك باليوم اقل شي مرتين وبعدها طلعنا لسهره .... ومن هنا تبدأ الأحداث ,,,,,,,,,,,,
طلعنا من الفله لسهره ووين كانت السهره ؟ فأحسن مكان عندهم يسمونه (النرجس) وعلى فكره تراه (النرجس) لازم بالحجز ودخلت أنا واخوي حسين ومو متحمسين إلا والله مندفعين , ويووووم دخلنا إلا الدخنه الله لايوريكم أشي دخان, واشي حشيش, واشي سيجار, واشي شيشيه, واشي طبخ,واشي إحراق كفرات الظاهر ...
وماتشوف شي من الدخنه وبعد ماجلسنا أنا واخوي حسين قلنا بنشوف الوضع إلا والله ربعنا الناصحين ماكذبوا علينا ثلاثة أرباع المكان كان كله بنات وقلنا نبي نشوف العينات إلا والله وش تشوفون انواااااع المقاشع والله مافيهم اللي تقول أنا ولا يفوتكم ربعنا الخليجين كل واحد متحضن له وحده كأنها زوجته وقسم بالله تلقونها وهي تضمه وعلى بالها تبوسه وهي تطالع بالشباب اللي وراه وأنا واخوي حسين من هنا بدينا نبرد ونربط بريك وقلنا والله ماتعدي السهره كذا ونقعد كل واحد يتمقل بالبنات اللي موجودات يمين ويسار والله ولا بالفزعه ورجعنا أنا واخوي حسين (نقلب خصـ.....؟؟؟) (بخف حنين) .
وكل واحد منا حط راسه وهو يهوجس بالسوالف اللي كان يسمعها يوم كان بالسعوديه من ربعه الناصحين .
وبعد ماصحينا من بكرا وافطرنا جبنا لكم الشغاله وخليناها تعطينا حصه تدريس لبعض الكلمات المغربيه تخبرون اخوي حسين مندفع الله يصلحه وبعدها طلعنا نتغدا برا نبي نشوش فرق الطبخ إلا والله يحليلها (سعاد) ويازين طبخها حاطين لنا بالمطعم لحم تشلاب الظاهر (كلاب) وبعد الغدا قال لنا السواق بنروح لمنطقه اسمها (اوريكا) وهالمنطقه يقول فيها شلالات ومناظر .... وحط رجلك يا محمد لـ(اوريكا) ولا ناصلها إلا قبل المغرب بشوي إلا والله وش تطلع اوريكا ؟؟ ماء يسيل بين الحصيان ولو اجتمعت أنا واخوي حسين وفرغنا ما ببطونا كان غطينا على ها الماء لاكن الواحد يقول ((نشوف)) من باب العلم بالشي .
وبعدها ماطولنا ورجعنا نتمشى فمراكش وعلى فكره السواق صاير يستدلخ ويستحمر شوي كل ماشاف واحد من (السلق) تراه أخر مره أقول لكم (السلق) يعني (الدرك) تلقونه يطالع فيه زي اللي يقول تراه معاي شباب خليجيين وقفوني وطبعا اخوي حسين هو اللي انتبه له والله لايوريكم إذا قلب المود حقه واسألوا عنه اللي كان يعزف بالفرقه الموسيقيه حقت (كافيه بلان) اللي فالجبل فبيروت والله ياهو اخبطه خبطه على علباه وبالآخر ((يعطيك العافيه)) .
المهم خلونا فـ(اوريكا) وحنا راجعين قال السواق أنا بنزلكم المقهى اللي أمس وأروح احجز لكم بالنرجس لان السهره الليله غير,,, البنات الليله كلهم راح يجون لنرجس وفيه بنات من برا مراكش .
نزلت أنا واخوي حسين للمقهى والطلب كالعاده ,,, الشاي المغربي ((لايوقف)) وبعدها طلعنا للفله نبي نتعشى ويوم وصلنا إلا ذاك الطاجن والحريره اللي تحكي وبعد ما تعشينا إلا سعاد الله يطول بعمرها جايتنا تبسم وتقول تراه أغراض الطبخ خلصة !! ياسعاااااد ,,, مايصير والأغراض اللي جبناها أمس حقت اسبوع كامل وطبعا سعاد لاتعليق مافيه إلا تبسم والله ياجماعة الخير إن العشاء نقز (مر) ربك يعين .
لبسنا أنا واخوي حسين وطلعنا لسهره ويوم وصلنا لـ(النرجس) وأخذنا لنا دقيقه على بال ماوصلنا لطاوله حقتنا من قوة الضباب اللي قدامنا وطبعا البنات ز ي ماهم اللي أمس موجودين وفيه زياده عليهم ويله ياحسين شف شغلك (يمين يسار) وياله ياله لقيت لي وحده مقبوله وأقوم وأروح لها واسحب الكرسي اللي جنبها واقعد اسولف معها سوالف العاده ,,,,,, (من وين من المغرب ؟) (ماشاء الله تول مره أشوفكم هنا ؟),,, وهي تلقاها مقطعه أم المكان بس الرد معروف ,,, (إيه والله فعلا أول مره أجي هنا ) صدقتك .
وسالفه من هنا وسالفه من هنا وبالأخير أنا ساكن فمجمع النخيل وش رايكم نكمل السهره هناك وش تتوقعون الرد ؟؟
الرد : اوكيه .... لاخطاء .
الرد : لا أنا مو حقين الحركات هاذي .... لا خطاء عليكم .
الرد : أنا إذا بطلع معك بـ(800)درهم وإذا بطلع أنا وأختي معكم الاثنين (الجوج) وش رايكم متعوب عليها (الجوج) راح نطلع معاكم بـ(1500)
طبعا أنا وش أول ماخطر فبالي أول ماقالت لي كذا والله ياجماعة ماخطر فبالي إلا كلام (الناصحين) يوم كانوا يقولون لنا ماتطلب شي وآخر شي تتكلم فيه الفلوس .
طبعا قلت يمكن أنا ماتوفقت في اللي يقولون عنهم لاكن العوض ولا القطيعه قلت خلاص اوكيه وقمت من عندها ورحت لأخوي حسين حبيب قلبي والله .
آخذ رايه قال ماعندك مشاكل وطلعنا حنا بسيارتنا وهم بسيارتهم (الحذر واجب) وبعد ماوصلنا الفله طبعا الطرب اللي موجود ((خليجي , لبناني , عراقي)) و (الرويشد) الرد اللي جاء من البنات (مافيه مغربي) لامافيه مغربي ,,,
وبعد الطرب أكون صريح معاكم.... ((الفراش)) وما تكلمت في ها الموضوع إلا ابغاكم تعرفون شي بالنهايه وخصوصا انتم يا المتزوجين .
بعد ما دخلنا غرفة النوم .... آوه معليش معليش فيه شغله بقولها لكم نسيت أقولها ...
(الناصحين) كانوا يقولون لنا إن البنت المغربيه أول ماتدخل معاك على طول تستأذنك وحطوا تحت كلمة تستأذنك خط ...
تستأذنك تروح تأخذ لها دش سريع وتبدل ملابسها , والله ياناس أنها دخلت وتربعت على الكنب (لادشي ولادشكم) ونرجع لموضوع غرفة النوم دخلنا الغرفه وبعد البوسات اللي على الخد لأنك لو جيت على الشفايف ستجد ما لايسرك وبعد ماشلت (التي شيرت) ياناس إن شعر إبطي ماعمره صار زي شعر إبطها وش تشوف آباط بنت وفيها شعر وش أفضل حل للحالات هاذي ,,؟
(خفف الاضاءه) وكمل شغلك وما أبغى أخليكم تقرفون أكثر وأقول لكم عن الأشياء السفليه لان الجزء العلوي خير برهان وطبعا بعد ماخلصنا أنا توني بخاطري طرب ورقص ,,, يله قومي (غزلان) وطبعا كلهم ماشاءالله اسمهم غزلان والله ياهم شوهو سمعت الغزال وابغاها تقوم معي إلا وش تقول (أنا تعًبٍت ابغي انعس)يعني أبغى أنام وأنا مو من طبعي أتودد ولا الزم إذا إن الشغله ماتسوا لاحظوا تراني قلت ((إذا)) يعني إذا أنها والله تسوا ,, لا والله لااتودد والزم .
قمت وطلعت ورحت لصاله ولافيه احد اخوي حسين اسمعه صاير يسب بالمغربي موب هين والله , وبع ماقعدت بالصاله لحالي قعدت اتذكر كلام ربعنا (الناصحين) يوم كنا بالسعوديه وش كانوا يقولون على طريقة تعامل البنت المغربيه لك وطريقة تعامل بنت بلادي والله ياناس كل اللي سويته (آآآآآه) وعلى طول شلت وخربطت مخي ورفعت صوت الطرب علشان ما ابي افكر بالموضوع .
واصبح الصبح وقمت الا والله سعاد مسويه الفطور وتبسم وتقول اغراض الغداء مافيه واخوي حسين نايم بالصاله وشلون ,,! ومتى ,,,! ما ادري .
وصحوا البنات وانا صحيت اخوي حسين والبنات مستعجلين يبون يمشون علشان البنت اللي كانت مع اخوي حسين فيه واحد بحريني بيغى يحولها فلوس , ليش ؟ ماادري .
آيواااااه الحين وقت الربع الناصحين وينكم ؟ وش كنتم تقولون عن طريقة الحساب ,,,,,؟؟؟
((الناصحين)) انتبه تعطيها الفلوس بيدها تراها تزعل حط الفلوس بالشنطه وهي تفهمها , ((الناصحين)) كانوا يقولون لنا ماتطلب شي بس تبي تقعد معك وتنبسط وانت اذا راح تعطيها انت وذمتك ,,,,
اي تقعد معك واي تنبسط معك واي بطيخ ... عاد النفس طايبه انا واخوي حسين منهم نبي فرقاهم بس قلنا نشوف الكلام اللي كانوا يقولونه لنا الربع الناصحين .
طلعوا البنات وانا واخوي حسين طلعنا نفطر بالبلكونه وكل واحد يقول وش صار معه وبعدها جانا الأهبل محمد علشان نبي نروح نجيب اغراض الغداء وطلعنا للمرجان وجبنا الأغراض بس هالمره عربيه وحده مليانه ع الأخر . رجعنا للبيت وتغدينا وبعدها طلعنا نتمشى وقلنا لسواق نبي مقهى غير المقهى اللي دايم نروح له , وراح فينا لمجمع مقاهي كل اللي فيه خليجين وتوهم صاحين من السكره وبعضهم باقي ماصحصح لحد الحين وش البنات اللي فيه تشوف مرسوم فوقها علامة الدولار ($) وربعنا الخليجين انواع التميلح والترزز فالشانز على غفله .
اللي صار رجعنا للمقهى حقنا الاول صح كل اللي فيه مغاربه بس غير اللي هناك , وحنا بالمقهى السوالف كانت وين السهره الليله نبي شي احسن من النرجس شغل مخك يامحمد وخل عنك الزرف لأنه لو نويناك انت الخسران وتاريخنا يشهد .
السواق اختار لنا كم مكان وقال لنا شوفوا اللي يعجبكم وبعد المقهى رجعنا للفله وريحنا شوي وبعدها على السهره وخلانا نشوف كذا مكان وكلها مزحومه من البنات بس بنات الله لايوريكم ولا بالفزعه . (وكل ,,,,,,,,, وله لاقط) . آآآآيه من هنا انا واخوي حسين طاب الخاطر وبدينا نسب بالديره وش السوات ياولد ؟ مالك الا المكان اللي سهرنا فيه قبل هو ارحم الموجود وانظفهم رجعنا لمحلنا النرجس والعينات نفسهم ماتغيروا وغزلان واللي معها موجودين وبعد ماجلسنا قامت وجلست معنا (مرررررره ميتين عليها) آوه شعورنا مايوصف انا واخوي حسين انه فيه بنت قامت قدام الشباب وقعدت معنا ,,, ماتدري ان النفس طايبه من الديره كلها مو منها بس .
وكالعاده انواع الافلام وش قالت لي : فيه وحده كانت البارح سهرانه معاهم وسرقت منها (100) دولار وكلك نظر,,؟ وطبعا محسوبكم خروف اول ماقالت له كذا صدقها وطلع الفيزا والماستر كارد والجواز بعد ....
والله حبيبتي معليش بس الفلوس اللي معنا كلها بالفله واحساب الطاوله كله مقفل من قبل مانجلس , تلقونها قاعده تقول بنفسها هاذولا وش جايبهم للمغرب حدهم البحرين وتخب عليهم , طيب اوكيه حبيبي انا رايحه اقعد مع صاحباتي ,,,, والمشكله صاحباتها صارقينها البارح ,,!
هاااااه ياحسين كيف الوضع ..؟ والله ياخوي ياسعد الوضع مايخارج وما اقول الاحسبي الله على اللي شار علينا بهاديره عرفت ان اخوي حسين خلااااص قفل على المشاريب , وش رايك ياحسين تبي نمشي وماحب يحوس جوي قال لي لا نقعد شوي , وانا قمت اطقس الجو وادور على شي يفتح النفس والمليعين اخوي حسين يمارس هوايته (تطليع البنات اللي قاعدين مع الشباب) واخيرا شفت لي وحده توها جايه تبي تدخل السهره وقفتها وسولفت معها وطبعا اتفقنا نروح للفله وماخليتها تدخل لسهره واخوي حسين داخل .
البنت وافقت واللي اعجبني وخلاني ادخل على اخوي حسين واخليه يطلع معي للفله ان البنت ماتكلمت بالفلوس وبعد ماطلعت انا واخوي حسين وهي لحقتنا بسيارتها للفله دخلنا وبصراحه كان اخوي حسين كاسر خاطري لأن مامعه بنت وبعد مابدا الرقص والطرب رحت انا وياها للغرفه (الفراش) ونسيت اقول لكم بعد , طبعا (الناصحين) كانوا يقولون لنا البنت اذا جت معك تجيب معها شنطه اكبر من شناطكم واللي صار ان البنت يوم دخلت للفله كان معها شنطه كبر شنطة عدة الحلاقه حقتي وسألتها اذا فيه معها كيس ولا شنطه تنزلها معها قبل ماندخل للغرفه وقالت لي لامافيه شي ....
المهم دخلنا للغرفه وللأمانه النظافه كانت افضل من اللي قبلها بكثير بس المصيبه ياناس اني اكتشفت اني نايم مع ثلااااااااجه والله ياناس برود غير طبيعي وتخيلوا الموقف ,,,!!!
طبعا قمت على طول ادور على اخوي حسين اشكي له الحال ,,,, هاه ياسعد وش صار معك ,,؟ لاتسأل ياحسين العلم ان الخاطر طايب .
جاء من بكرا من بعد ماصحينا الا والله البنت صاحيه ومرتزه بالصاله وتبي تمشي , وش اللي سويته انا قلت بنفسي بحط لها الفلوس بشنطتها وبشوف وش راح تكون ردة فعلها , وبعد ماحطيت لها الفلوس بالشنطه قامت واخذت شنطتها وتسألني (هاه حبيبي كم حطيت) ماشاء الله هاذولا اللي مايسألون , والله حطيت لك حبيبتي (800) درهم .
ايش,,؟ كيف,,؟ (800)درهم انا على بالي مكرمها الا والله البنت معصبه وزعلانه , وش قالت لي : هاذا لوانا نايمه فيها مع واحد مغربي , اقول والله ماعندي غيرها تبينها ولا هاتيها , ومشت ولا حتى كلمة باي .
ولحد هنا اوقف عن اكمال المسلسل لأني بصراحه ابغى اشوف ردكم لي ...
اواصل بكتابة المسلسل ولا اوقف ...
مع تحيات محمد القدومي